«ՀԱՎԱՏԱՐՄԱԳՐՄԱՆ ՄԱՍԻՆ» ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

 «ՀԱՎԱՏԱՐՄԱԳՐՄԱՆ ՄԱՍԻՆ» ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՕՐԵՆՔԻ ՆԱԽԱԳԾԻ ԸՆԴՈՒՆՄԱՆ ՄԱՍԻՆ

1.    Անհրաժեշտությունը

     Սույն նախագծի փոփոխության և լրացման անհրաժեշտությունը պայմանավորված է Հավատարմագրման ազգային մարմնի որոշակի գործառույթներում նախատեսվող փոփոխություններով։ Նախագծով առաջարկվում է կատարել մի շարք փոփոխություններ և լրացումներ՝ նպատակ ունենալով արդիականացնել և կատարելագործել հավատարմագրման ոլորտի կարգավորումները, ապահովել դրա համապատասխանությունը միջազգային լավագույն փորձին և ընթացիկ կարիքներին։

2. Ընթացիկ իրավիճակը և խնդիրները

«Հավատարմագրման ազգային մարմին» ՊՈԱԿ-ն հավատարմագրման գործընթացն իրականացնում է համաձայն «Հավատարմագրման մասին» ՀՀ օրենքի, այլ իրավական ակտերի, ինչպես նաև ԻՍՕ/ԻԷԿ 17011 ստանդարտի, տարածաշրջանային, այդ թվում` եվրոպական և միջպետական, միջազգային ստանդարտների պահանջներին:

3.  Կարգավորման նպատակը և բնույթը

Նախագծով նախատեսված փոփոխությունները հնարավորություն են տալիս հստակեցնել կիրառվող տերմինաբանությունը և կարգավորել այն գործնական իրավիճակները, որոնք առաջացել են վերջին տարիներին հավատարմագրման ոլորտում՝ այդ թվում միջազգային համագործակցության շրջանակներում։ Վերոգրյալի օրինակ է այն, որ Հավատարմագրման ազգային մարմնի գործառույթներում ավելացել է նաև պետական գրանցում իրականացնող իրավաբանական անձանց վկայագրման գործառույթը։

Նախատեսվող լրացումներն ու փոփոխությունները կնպաստեն ՀՀ հավատարմագրման համակարգի միջազգային ճանաչելիությանը և համագործակցությանը՝ միջազգային և տարածաշրջանային հավատարմագրման մարմինների հետ։

4.      Նախագծի մշակման գործընթացում ներգրավված ինստիտուտները և անձինք

Սույն Նախագիծը մշակվել է Էկոնոմիկայի նախարարության և «Հավատարմագրման ազգային մարմին» ՊՈԱԿ-ի կողմից։

5.      Ակնկալվող արդյունքը

Նախագծի ընդունման արդյուքում՝

ü  կբարելավվի հավատարմագրման ոլորտի կարգավորման հստակությունն ու կիրառելիությունը,

ü  կներդրվեն նոր հասկացություններ և մեխանիզմներ (օրինակ՝ ճկուն հավատարմագրման ոլորտ, համապատասխանության գնահատման սխեմա, տեխնիկական գնահատող),

ü  Կսահմանվեն հստակ ընթացակարգեր՝ բողոքարկման, գնահատման, ռեեստրների վարման և նոր սխեմաների հաստատման համար։

Նախագծով նախատեսված հավատարմագրման ճկուն ոլորտի վերաբերյալ «Հավատարմագրման ազգային մարմին» ՊՈԱԿ-ի կողմից յուրաքանչյուր եռամսյակ հաշվետվություն կներկայացվի Էկոնոմիկայի նախարարություն։ Վերոնշյալով պայմանավորված Նախարարության կողմից նախատեսվում է իրականացնել փոփոխություն ՀՀ էկոնոմիկայի նախարարի 2020 թվականի հունվարի 31-ի «Ստանդարտացման, համապատասխանության գնահատման, հավատարմագրման և չափումների միասնականության ապահովման ոլորտներում տեղեկատվության ներկայացնելու և ՀՀ էկոնոմիկայի նախարարի 2015 թվականի օգոստոսի 25-ի 1196-Ա հրամանն ուժը կորցրած ճանաչելու մասին» N 129-Ա հրամանում։

6.   Կապը ռազմավարական փաստաթղթերի հետ

    Սույն Նախագծի ընդունումը բխում է Կառավարության 2021 թվականի նոյեմբերի 18-ի N 1902-Լ որոշումով հաստատված Հայաստանի Հանրապետության կառավարության 2021-2026 թվականների գործունեության միջոցառումների ծրագրի Էկոնոմիկայի նախարարության բաժնի «11.3 Համապատասխանության գնահատման և հավատարմագրման կարողությունների զարգացում՝ թիրախ սահմանելով հավատարմագրման ազգային մարմնի միջազգային ճանաչմանն ուղղված բազմակողմ ճանաչման համաձայնագրերի կնքումը տարածաշրջանային և միջազգային հավատարմագրման կազմակերպությունների հետ (EA, ILAC, IAF)» միջոցառման իրականացման հետ։