«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2018 ԹՎԱԿԱՆԻ ՕԳՈՍՏՈՍԻ 9-Ի №911-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2018 ԹՎԱԿԱՆԻ ՕԳՈՍՏՈՍԻ 9-Ի N 911-Ն ՈՐՈՇՄԱՆ ՄԵՋ փոփոխություններ ԿԱՏԱՐԵԼՈՒ ՄԱՍԻՆ» ԿԱՌԱՎԱՐՈՒԹՅԱՆ ՈՐՈՇՄԱՆ ընդունման

1. Ընթացիկ իրավիճակը և իրավական ակտի ընդունման անհրաժեշտու­թյունը

«Հայաստանի Հանրապետության կառավարության 2018 թվականի օգոստոսի 9-ի  №911-Ն որոշման մեջ փոփոխություններ կատարելու մասին» Հայաստանի Հանրապետության կառավարության որոշման նախագծի (այսուհետ՝ Նախագիծ) ընդունումը բխում է Հայաստանի Հանրապետության վարչապետի 2025 թվականի փետրվարի 10-ի «Հատուկ պետական պաշտպանության ենթակա անձանց անվտանգության ապահովման մասին» օրենքում լրացումներ և փոփոխություններ կատարելու մասին» օրենքի կիրարկումն ապահովող միջոցառումների ցանկը հաստատելու մասին» № 113-Ա որոշմամբ հաստատված ցանկի 4-րդ կետից:

 «Զինվորական ծառայության և զինծառայողի կարգավիճակի մասին» օրենքի 3-րդ հոդվածի 1-ին մասի համաձայն՝

«1. Զինվորական ծառայությունը Հայաստանի Հանրապետության պաշտպանության և ներքին գործերի նախարարությունների ու ազգային անվտանգության և պետական պահպանության մարմինների համակարգերում օրենքով սահմանված պետական ծառայության տեսակ է: (...):»:

«Պաշտպանության մասին» օրենքի 3-րդ հոդվածի 1-ին մասի 7-րդ կետի համաձայն՝ ՀՀ պետական պահպանության ծառայությունը (այսուհետ՝ նաև Ծառայություն) դասվում է այլ զորքերի շարքին:

«Հատուկ պետական պաշտպանության ենթակա անձանց անվտանգության ապահովման մասին» օրենքի 16-րդ հոդվածի 1-ին մասի համաձայն՝

«1. Ծառայությունը համալրվում է միայն Հայաստանի Հանրապետության քաղաքացի զինծառայողներով։

Ծառայության սպաները և ենթասպաները զինծառայողներ են և զինվորական ծառայությունն անցնում են ազգային անվտանգության մարմիններում ծառայությունը կարգավորող օրենսդրությանը համապատասխան (...)։»:

Նույն օրենքի 16.1-ին հոդվածը սահմանում է Ծառայության ծառայողների պաշտոնների խմբերը և զինվորական կոչումները: Մասնավորապես.

Ծառայության ծառայողների պաշտոնները դասակարգվում են հետևյալ 5 խմբերի՝ բարձրագույն, գլխավոր, ավագ, միջին և կրտսեր.

Ծառայության ծառայողներին, որպես զինծառայողների, շնորհվում են հետևյալ զինվորական կոչումները՝ ենթասպա, ավագ ենթասպա, լեյտենանտ, ավագ լեյտենանտ, կապիտան, մայոր, փոխգնդապետ, գնդապետ, գեներալ-մայոր և
 գեներալ-լեյտենանտ:

«Հանրային ծառայության մասին» օրենքի 16-րդ հոդվածի 2-րդ մասի համաձայն՝ հանրային ծառայության առանձին տեսակներով նախատեսված պաշտոնների, դասային կոչումների և աստիճանների համապատասխանությունը սահմանում է Կառավարությունը:

ՀՀ կառավարության 2018 թվականի օգոստոսի 9-ի N 911-Ն որոշման № 1 հավելվածով սահմանվել է օրենքով նախատեսված դեպքերում և շրջանակներում հանրային ծառայության առանձին տեսակներով նախատեսված պաշտոնների համապատասխանությունը, իսկ № 2 հավելվածով՝ օրենքով նախատեսված դեպքերում և շրջանակներում դասային կոչումների և աստիճանների համապատասխանությունը:

Սակայն № 1 հավելվածի «Պաշտպանության նախարարության զինվորական ծառայության պաշտոններ» վերտառությամբ սյունակը վերնագրված է ոչ թե հանրային ծառայության առանձին տեսակով, այլ պետական կառավարման համակարգի մարմնի անվան և հանրային ծառայության առանձին տեսակի զուգակցմամբ՝ այն  կիրառելի դարձնելով միայն Պաշտպանության նախարարության զինվորական ծառայության պաշտոնների նկատմամբ, իսկ № 2 հավելվածի 12-րդ սյունակը կիրառելի է բացառապես զինված ուժերում շնորհվող կոչումներին:

Բացի այդ, միմյանց չեն համապատասխանում «Զինվորական ծառայության և զինծառայողի կարգավիճակի մասին» օրենքի 9-րդ հոդվածով սահմանվող զինվորական ծառայության պաշտոնների դասակարգումը և «Հատուկ պետական պաշտպանության ենթակա անձանց անվտանգության ապահովման մասին» օրենքի 16.1-ին հոդվածի 1-ին մասով սահմանվող Ծառայության ծառայողների պաշտոնները դասակարգումը:

Վերոնշյալը թույլ չի տալիս հանրային ծառայության առանձին տեսակներով նախատեսված պաշտոնների, դասային կոչումների և աստիճանների համապատասխանությունը որոշելիս առաջնորդվել № 1 հավելվածի «Պաշտպանության նախարարության զինվորական ծառայության պաշտոններ» և № 2 հավելվածի «Զինված ուժերում շնորհվող կոչումներ» սյունակներով:

ՈՒստի անհրաժեշտություն է առաջացել խմբագրել վերոգրյալ հավելվածների համապատասխան սյունակներն այնպես, որ դրանցում նախատեսված կոչումները և պաշտոնները համապատասխանեցվեն «Հատուկ պետական պաշտպանության ենթակա անձանց անվտանգության ապահովման մասին» օրենքով սահմանված Ծառայության զինվորական ծառայության պաշտոններին և Ծառայությունում շնորհվող զինվորական կոչումներին:

2. Առաջարկվող կարգավորման բնույթը.

Նախագծով առաջարկվում է խմբագրել ՀՀ կառավարության 2018 թվականի օգոստոսի 9-ի N 911-Ն որոշման № 1 հավելվածի «Պաշտպանության նախարարության զինվորական ծառայության պաշտոններ» վերտառությամբ սյունակը և № 2 հավելվածի «Զինված ուժերում շնորհվող կոչումներ» վերտառությամբ 12-րդ սյունակը, դրանց վերնագրերն ու բովանդակությունը համապատասանեցնելով նաև «Հատուկ պետական պաշտպանության ենթակա անձանց անվտանգության ապահովման մասին» օրենքով սահմանված Ծառայության զինվորական ծառայության պաշտոններին և Ծառայությունում շնորհվող զինվորական կոչումներին:

3. Ակնկալվող արդյունքը.

Նախագծի ընդունմամբ ՀՀ կառավարության 2018 թվականի օգոստոսի 9-ի N 911-Ն որոշմամբ սահմանված հանրային ծառայության առանձին տեսակներով նախատեսված պաշտոնների, դասային կոչումների և աստիճանների համապատասխանությունը որոշելիս հաշվի կառնվեն նաև «Հատուկ պետական պաշտպանության ենթակա անձանց անվտանգության ապահովման մասին» օրենքով սահմանված Ծառայության զինվորական ծառայության պաշտոնները և Ծառայությունում շնորհվող զինվորական կոչումները:

4. Նախագծի մշակման գործընթացում ներգրավված ինստիտուտները և անձինք.

Նախագիծը մշակվել է ՀՀ պետական պահպանության ծառայության կողմից:

5. Կապը ռազմավարական փաստաթղթերի հետ. Հայաստանի վերափոխման ռազմա­վա­րու­թյուն 2050, Կառավարության 2021-2026թթ. ծրագիր, ոլորտային և/կամ այլ ռազմա­վա­րու­թյուն­ներ

Նախագիծը  ընդունումը չի բխում որևէ ռազմավարական փաստաթղթից:

6. Լրացուցիչ ֆինանսական միջոցների անհրաժեշտությունը ևպետական բյուջեի եկամուտներում և ծախսերում սպասվելիք փոփոխությունները

ՀՀ կառավարության որոշման նախագծի ընդունման կապակցությամբ լրացուցիչ ֆինանսական միջոցների անհրաժեշտություն չի առաջանում և պետական բյուջեի եկամուտներում և ծախսերում փոփոխություններ չեն սպասվում: