ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2012 ԹՎԱԿԱՆԻ ՀՈՒԼԻՍԻ 26-Ի N 954-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

Հ Ի Մ Ն Ա Վ Ո Ր ՈՒ Մ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2012 ԹՎԱԿԱՆԻ ՀՈՒԼԻՍԻ 26-Ի N 954-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ»

ՀՀ  ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

1. Ընթացիկ իրավիճակը և իրավական ակտի ընդունման անհրաժեշտությունը

Համաձայն ՀՀ կառավարության 2012 թվականի հուլիսի 26-ի «Հայաստանի Հանրապետության գիտությունների ազգային ակադեմիայի համակարգում ներառված պետական ոչ առևտրային կազմակերպությունների ցանկը, դրանց տիպային (օրինակելի) կանոնադրությունը հաստատելու և Հայաստանի Հանրապետության կառավարության 2002 թվականի սեպտեմբերի 12-ի N 1474-Ն որոշման մեջ փոփոխություններ կատարելու մասին» N 954-Ն որոշման (այսուհետ՝ Որոշում) N 1 և N 2 Հավելվածների հաստատվել են ՀՀ ԳԱԱ համակարգում ներառված պետական ոչ առևտրային կազմակերպությունների ցանկը և ՀՀ ԳԱԱ համակարգում ներառված պետական ոչ առևտրային կազմակերպությունների տիպային (օրինակելի) կանոնադրությունը, որտեղ գրանցված ձեռնարկատիրական գործունեության տեսակները չեն ապահովում «Ա. Թախտաջյանի անվան բուսաբանության ինստիտուտ» ՊՈԱԿ-ի (այսուհետ՝ ՊՈԱԿ) ներուժի ամբողջ ծավալով ձեռնարկատիրական գործունեության իրականացումը:

Միաժամանակ, հարկ եմ համարում նշել, որ ՊՈԱԿ-ի գործող կանոնադրությամբ ձեռնարկատիրական գործունեության տեսակները խիստ սահմանափակ են, որով պայմանավորված սահմանափակվում են նաև ՊՈԱԿ-ի ամբողջ ներուժի և հնարավորությունների իրականացումը: Վերջինովս պայմանավորված ՊՈԱԿ-ը գրությամբ դիմել էր ՀՀ վարչապետ Ն. Փաշինյանին, որով ներկայացրել էր իր գործունեության և կանոնադրական նպատակների առավել արդյունավետ իրականացման, ներկայացուցչական, արդիականացման և մյուս նպատակների իրագործման և հնարավոր ռեսուրսների օգտագործման ապահովման համար ընդլայնելու ձեռնարկատիրական գործունեության տեսակները: Ներկայացվող փոփոխությունները թույլ կտան և կնպաստեն ՊՈԱԿ-ի ներուժի ամբողջ ծավալով իրականացմանը, կնպաստեն բուսականության, բուսատեսակների աճին և հանրայնացմանը, կառաջացնեն պահանջարկի աճ՝ զուգորդված բուսակների քանակների և տեսակների աճեցման ծավալների մեծացմամբ, հնարավորություն կընձեռեն ամանորյա տոնակատարությունների ժամանակ նվազեցնել ավանդական ծառատեսակի հատման (ներառյալ՝ ապօրինի) ծավալները, հիմք կհանդիսանան նոր և արտասահմանյան բուսատեսակների ներմուծման, աճեցման համար, կզարգացնեն և կարդիականացնեն բուսաբանական այգիները՝ այցելուներին ապահովելով էականորեն ավելի լայն և բազմաբովանդակ գիտակրթական և այլ տեսակի ծառայություններ, հնարավորություն կստեղծեն այլ պետությունների բուսաբանական այգիների հետ համատեղ ծրագրեր իրականացնելու՝ նոր պրոդուկտների ստեղծման նախադրյալներով, ինչպես նաև հաշվի առնելով տարածքի տեղադիրքը, նշանակությունը, մակերեսը, «Կյանքի պուրակ» անտառնախագծի կյանքի կոչումը, կստեղծեն ավելի բարենպաստ պայմաններ այցելուների համար՝ միաժամանակ նպաստելով բուսաբանական այգիներում հանգստի կազմակերպմանը: Վերոնշյալ նպատակներին հասնելու հնարավորությունները ներկայումս սահմանափակված են կանոնադրությամբ:

Հաշվի առնելով վերոգրյալը և հիմք ընդունելով ՀՀ վարչապետի աշխատակազմի ղեկավարի 2024 թվականի հուլիսի 7-ի N 02/11/25344-2024 գրությամբ «ՀՀ ԳԱԱ Ա. Թախտաջյանի անվան բուսաբանության ինստիտուտ» ՊՈԱԿ-ի կանոնադրության մեջ առաջարկվող փոփոխությունների վերաբերյալ համաձայնությունը և ՀՀ ԿԳՄՍ նախարարության 2024 թվականի հուլիսի 23-ի N 01/9.1.1/21767-24 և ՀՀ ԳԱԱ-ի 2024 թվականի հուլիսի 17-ի N 24-01/348 գրություններով կանոնադրության փոփոխության վերաբերյալ առարկություններ չունենալու մասին դիրքորոշումները՝ ՀՀ ԳԱԱ-ի կողմից մշակվել է «Հայաստանի Հանրապետության կառավարության 2012 թվականի հուլիսի 26-ի N 954-Ն որոշման մեջ լրացում կատարելու մասին» ՀՀ կառավարության որոշման նախագիծը (այսուհետ՝ Նախագիծ):

2. Առաջարկվող կարգավորման բնույթը

      Նախագծով առաջարկվում է Որոշման N 2 Հավելվածը լրացնել նոր 14.1-ին կետով, որով ՊՈԱԿ-ին թույլատրվում է զբաղվել նաև հետևյալ ձեռնարկատիրական գործունեության տեսակներով.

• ծաղիկների և բույսերի աճեցում, մանրածախ և մեծածախ վաճառք,
• ամանորի համար փշատերև ծառատեսակների աճեցում և վաճառք,
• տնկիների և այլ տնկանյութերի աճեցում և վաճառք,
• խաղողի այգիների հիմնում, ստացված խաղողից գինու արտադրություն և վաճառք,
• անտառային տնտեսության բնագավառում օժանդակ ծառայությունների մատուցում,
• մանրածախ առևտուր կրպակներից, տաղավարներից և շուկաներից դուրս,
• բուսաբանական այգիների գործունեություն, բուսաբանական այգիների տարածքում բնակչությանը վճարովի ծառայությունների մատուցում՝ այցելուների սննդի կազմակերպում՝ պատրաստի սննդի, ոչ ալկոհոլային խմիչքների, զտված և հանքային ջրերի տրամադրում, հեծանիվների վարձույթի տրամադրում և այլն,
• միջոցառումների կազմակերպում՝ էքսկուրսիաներ, մարզական, առողջ ապրելակերպի միջոցառումներ և կրթության բնագավառում այլ օժանդակ գործունեության իրականացում,
• ֆիլմերի, ֆոտոսեսիաների և նմանաբովանդակ նախաձեռնություններով լուսանկարահանման կազմակերպում և տարածքի տրամադրում,
• հուշանվերների և այլ արտադրանքի վաճառք և/կամ վերավաճառք,
• հանգստի կազմակերպման ապահովման նպատակով մանրածախ առևտրի իրականացում, այդ թվում առևտրային իրավաբանական անձի հիմնադրմամբ:

3. Նախագծի մշակման գործընթացում ներգրավված ինստիտուտները, անձինք և նրանց դիրքորոշումը

       «Հայաստանի Հանրապետության կառավարության 2012 թվականի հուլիսի 26-ի N 954-Ն որոշման մեջ լրացում կատարելու մասին» ՀՀ կառավարության որոշման նախագիծը մշակվել է ՀՀ կրթության, գիտության, մշակույթի և սպորտի նախարարության բարձրագույն կրթության և գիտության կոմիտեն ՀՀ գիտությունների ազգային ակադեմիայի հետ համատեղ:

4. Ակնկալվող արդյունքը

«Հայաստանի Հանրապետության կառավարության 2012 թվականի հուլիսի 26-ի N 954-Ն որոշման մեջ լրացում կատարելու մասին» ՀՀ կառավարության որոշման նախագծի ընդունմամբ կհստակեցվեն և կլավարկվեն ՊՈԱԿ-ի ձեռնարկատիրական գործունեության տեսակները, որով պայմանավորված կստեղվծեն ավելի բարենպաստ պայմաններ այցելուների համար:

5. Նախագծի ընդունման կապակցությամբ լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվող փոփոխությունների մասին

      «Հայաստանի Հանրապետության կառավարության 2012 թվականի հուլիսի 26-ի N 954-Ն որոշման մեջ լրացում կատարելու մասին» ՀՀ կառավարության որոշման նախագծի ընդունման կապակցությամբ պետական բյուջեում կամ տեղական ինքնակառավարման մարմինների բյուջեներում ծախսերի և եկամուտների էական ավելացումներ կամ նվազեցումներ չեն սպասվում:

6. Նախագծի ընդունման կապակցությամբ այլ իրավական ակտերի նախագծերի կամ դրանց ընդունման անհրաժեշտության բացակայության մասին

«Հայաստանի Հանրապետության կառավարության 2012 թվականի հուլիսի 26-ի N 954-Ն որոշման մեջ լրացում կատարելու մասին» ՀՀ կառավարության որոշման նախագծի ընդունմամբ այլ իրավական ակտերում փոփոխություններ կատարելու անհրաժեշտությունը բացակայում է:

7. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ

«Հայաստանի Հանրապետության կառավարության 2012 թվականի հուլիսի 26-ի N 954-Ն որոշման մեջ լրացում կատարելու մասին» ՀՀ կառավարության որոշման նախագիծը չի բխում ռազմավարական փաստաթղթերից: