ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՏՆՏԵՍԱԿԱՆ ԱՐԴՅՈՒՆԱՎԵՏՈՒԹՅԱՆ ՊԵՏԱԿԱՆ ՓՈՐՁԱՐԿՈՒՄՆԵՐԻ ԵՆԹԱԿԱ ԲՈՒՅՍԵՐԻ ՏԵՍԱԿՆԵՐԻ ՑԱՆԿԸ ՍԱՀՄԱՆԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐԻ 2005 ԹՎԱԿԱՆԻ ՀՈԿՏԵՄԲԵՐԻ 28-Ի N 190-Ն ՀՐԱՄԱՆՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

ՀԻՄՆԱՎՈՐՈՒՄ

«Հայաստանի Հանրապետությունում տնտեսական արդյունավետության պետական փորձարկումների ենթակա բույսերի տեսակների ցանկը սահմանելու և Հայաստանի Հանրապետության գյուղատնտեսության նախարարի 2005 թվականի հոկտեմբերի 28-ի N 190-Ն հրամանն ուժը կորցրած ճանաչելու մասին» Հայաստանի Հանրապետության էկոնոմիկայի նախարարի հրամանի նախագծի

   1․ Առկա իրավիճակը և իրավական ակտի ընդունման անհրաժեշտությունը։

Հայաստանի Հանրապետությունում երբևէ տնկանյութի հավաստագրում չի իրականացվել և պտղաբուծության ճյուղի զարգացումն ապահովելու անհրաժեշտությամբ պայմանավորված 2022 թվականի սեպտեմբերի 14-ին ընդունվեց «Սերմերի և տնկանյութի մասին» ՀՀ օրենքը, որն ուժի մեջ է մտնելու 2023 թվականի հոկտեմբերի 5-ից։ Նշյալ օրենքի 5-րդ հոդվածի 3-րդ մասի համաձայն լիազոր մարմնի կողմից պետք է սահմանվի Հայաստանի Հանրապետությունում տնտեսական արդյունավետության փորձարկումների ենթակա բույսերի տեսակների ցանկը։ Օրենքի 5-րդ հոդվածի 1-ին մասի համաձայն Հայաստանի Հանրապետության տարածքում օգտագործման և հետագա բազմացման նպատակով թույլատրվում են այն սորտերն ու հիբրիդները և տնկանյութի այն ձևերը, որոնք անցել են տնտեսական արդյունավետության պետական փորձարկում և գրանցվել են օգտագործման թույլտվություն ունեցող սորտերի և հիբրիդների ցանկում։ Հայաստանի Հանրապետությունում  պտղահատապտղային մշակաբույսերի նոր սորտերի տնտեսական արդյունավետության պետական փորձարկումներ դեռևս չեն իրականացվել, սակայն արտադրության մեջ ներդրված են, ուստի անհրաժեշտ է պտղահատապտղատու մշակաբույսերի համար ևս իրականացնել տնտեսական արդյունավետության փորձարկումներ։

2․ Խնդրի սահմանումը։

«Սերմերի և տնկանյութի մասին» ՀՀ օրենքի 5-րդ հոդվածի 3-րդ մասի համաձայն Հայաստանի Հանրապետությունում տնտեսական արդյունավետության փորձարկումների ենթակա բույսերի տեսակների ցանկը սահմանում է լիազոր մարմինը, սակայն ներկայումս բացակայում է վերոնշյալ իրավական ակտը։

3․ Կարգավորման նպատակը

Ներկայացվող իրավական ակտի նպատակն է սահմանել Հայաստանի Հանրապետության բնակլիմայական պայմաններում մշակվող և տնտեսական արժեք ներկայացնող տնտեսական արդյունավետության փորձարկումների ենթակա բույսերի տեսակների ցանկը, ինչպես նաև ապահովել այգեգործության ճյուղի շարունակական արտադրությունն ու զարգացումը։

4․ Ակնկալվող արդյունքը։

Սույն իրավական ակտի ընդունման պարագայում Հայաստանի Հանրապետությունում կապահովվի գյուղատնտեսական մշակաբույսերի մշակության տնտեսական արդյյունավետությունը, կավելանա համախառն արտադրանքը և արտահանման ծավալները։