«Հայաստանի Հանրապետության կառավարության 2023 թվականի փետրվարի 9-ի N 181-Ն որոշման մեջ փոփոխություն կատարելու մասին» Հայաստանի Հանրապետության կառավարության որոշման նախագիծը

Կարծում եմ՝ հանրակրթական ուսումնական հաստատության տնօրեն դառնալու համար անհրաժեշտ է ունենալ կրթական ձեռքբերումներ, մասնագիտական գործունեության հարուստ փորձ։ Եթե տնօրեն դառնալու համար անձը պետք է ունենա առնվազն 7 տարվա ստաժ, ենթադրվում է, որ այդ տարիների ընթացքում նա պետք է իրեն դրսևորած լինի որպես ակտիվ, նախաձեռնող, իր գործի գիտակ, աշակերտների և ծնողների շրջանում հեղինակություն վայելող, տարակարգ ունեցող, կամավոր ատեստավորում անցած ուսուցիչ-առաջնորդ։ Այլապես ստեղծվում է մի իրավիճակ, երբ այնպիսի անձ է հավակնում դառնալ տնօրեն, որը իր գործունեության ընթացքում որևէ ձեռքբերում չի ունեցել, և որի միակ ձեռքբերումը ղեկավարման իրավունքի հավաստագիրն է։ Առաջարկում եմ վերանայել տնօրենի պաշտոնին հավակնելու համար անհրաժեշտ պահանջները։

Հավելվածի կետ 26-ում նշված է, որ լիազոր մարմնի համապատասխան ստորաբաժանումը սույն կարգի 8-րդ կետով սահմանված մրցույթին մասնակցելու մասին հայտերն ընդունելու ժամկետն ավարտվելուց հետո՝ 1 աշխատանքային օրվա ընթացքում, էլեկտրոնային եղանակով ներկայացնում է մասնագիտական հանձնաժողովին: Առաջարկում եմ հստակեցնել, թե լիազոր մարմնի համապատասխան ստորաբաժանումը ինչն է ներկայացնում մասնագիտական հանձնաժողովին՝ միայն զարգացման ծրագիրը, թե ամբողջական փաթեթը /դիմում, ինքնակենսագրական, հավաստագիր, զարգացման ծրագիր, արձանագրություններ/։ Կարծում եմ` օբյեկտիվ որոշում կայացնելու համար կարևոր է, որպեսզի մասնագիտական հանձնաժողովը հնարավորություն ունենա ծանոթանալու յուրաքանչյուր հավակնորդի կրթությանը, աշխատանքային գործունեությանը, մասնագիտական ոլորտներում գործունեության փորձի նկարագրին, վերապատրաստումներին, գիտական հոդվածներին, պարգևներին և այլն։

Կարգում կատարված փոփոխությունները ողջունելի են, հատկապես կարևոր են այն փոփոխությունները, որոնք կնպաստեն անաչառ որոշումների կայացմանը, արդյունքում տնօրեն կնշանակվեն միայն պատրաստված և պաշտոնին համապատասխանող մասնագետներ։ Հավելվածի կետ 30-ի փոփոխությունը, համաձայն որի զարգացման ծրագրում կազմակերպության կողմից այլ զարգացման ծրագրերից ամբողջական կամ մասնակի արտագրության դեպքերի բացահայտման դեպքում զարգացման ծրագիրը գնահատվում է 0 միավոր, և տրամադրվող եզրակացության մեջ նշում է կատարվում արտագրության փաստի մասին։ Դպրոցի զարգացման ծրագիրը դպրոցի առաջընթացի հիմքն է, և անհրաժեշտ է բացառել տարբեր զարգացման ծրագրերից արտագրության դեպքերը, ինչպես նաև այն դեպքերը, երբ զարգացման ծրագրերը գրվում են այլ անձանց կողմից։ Սրա լավագույն լուծումը կարգով առաջարկվող փոփոխությունն է, համաձայն որի հավակնորդի հետ հարցազրույցն իրականացնում է մասնագիտական նույն հանձնաժողովը, որը եզրակացություն է տալիս զարգացման ծրագրի վերաբերյալ։ Սա հնարավորություն կտա բացահայտել, թե որքանով է հավակնորդը իրապես տիրապետում իր գրած զարգացման ծրագրին։