<<Հայաստանի Հանրապետության կառավարության 2009 թվականի նոյեմբերի 12-ի N 1308-Ն որոշման մեջ փոփոխություններ և լրացումներ կատարելու մասին>> ՀՀ կառավարության որոշման նախագիծ

ՏԵՂԵԿԱՆՔ-ՀԻՄՆԱՎՈՐՈՒՄ

<<Հայաստանի Հանրապետության կառավարության 2009 թվականի նոյեմբերի 12-ի N 1308-Ն որոշման մեջ փոփոխություններ և լրացումներ կատարելու մասին>>  ՀՀ կառավարության որոշման նախագծի ընդունման

1. Անհրաժեշտությունը.

          Ներկայացված օրենսդրական նախագծի փաթեթով առաջարկվող իրավակարգավորումների անհրաժեշտությունը  պայմանավորված է.

• Հայաստանի Հանրապետության կողմից ստանձնած միջազգային պարտավորությունների կատարման և ազգային անվտանգության ապահովման նպատակով ռազմական նշանակության արտադրանք համարվող ապրանքների ցանկերի արդիականացման և համաշխարհային (միջազգային) տեխնիկական, տեխնոլոգիական զարգացումներով և այլ հանգամանքներով:
• «Լիցենզավորման մասին» Հայաստանի Հանրապետության օրենքում կատարված փոփոխություններով:
• Ռազմական նշանակության արտադրանքի ներմուծման և արտահանման, տարանցիկ փոխադրման և առևտրի միջնորդական գործունեության լիցենզիաներ ստանալու դիմումին կից ներկայացվող պահանջները լրացնելու և փոփոխելու, և ռազմական նշանակության արտադրանքի ներմուծման և արտահանման, տարանցիկ փոխադրման և առևտրի միջնորդական գործունեության վերաբերյալ եզրակացություն ստանալու դիմումին կից ներկայացվող անհրաժեշտ փաստաթղթերի լրացման կարգի փոփոխության անհրաժեշտությամբ:

2. Ընթացիկ իրավիճակը և խնդիրները.

Ներկա խմբագրությամբ Հայաստանի Հանրապետության կառավարության 2009 թվականի նոյեմբերի 12-ի № 1308-Ն որոշման Հավելված 1-ում ներառված են 2021թ. դեկտեմբերի 31-ի դրությամբ առկա ցանկերը, որոնք ունեն համալրման կարիք: Հսկվող ապրանքների ցանկերում պարբերաբար կատարվում են փոփոխություններ՝ պայմանավորված համաշխարհային (միջազգային) տեխնիկական, տեխնոլոգիական զարգացումներով և այլ հանգամանքներով: Հսկվող ապրանքների ցանկերի միջոցով որոշվում է արտադրանքների ապրանքային պատկանելիությունը (ռազմական, երկակի կամ հասարակ/սովորական նշանակության արտադրանք):     

3. Կարգավորման նպատակը և ակնկալվող արդյունքը.

Հայաստանի Հանրապետության կողմից ստանձնած միջազգային անվտանգության ապահովման ուղղությամբ միջազգային պարտավորությունների կատարումը, ինչպես նաև ազգային անվտանգության ապահովումը պահանջում է խիստ հսկողություն իրականացնել այնպիսի ապրանքների ներմուծման, արտահանման, տարանցիկ փոխադրման, ինչպես նաև այնպիսի ապրանքների և մտավոր գործունեության արդյունքների առևտրի միջնորդական գործունեության նկատմամբ, որոնք իրենց բնույթին համապատասխան նախատեսված են օգտագործման բացառապես ռազմական նպատակներով:

Ելնելով վերոգրյալից համալրել Հայաստանի Հանրապետության կառավարության 2009 թվականի նոյեմբերի 12-ի № 1308-Ն որոշման Հավելված 1-ում առկա Ռազմական նշանակության արտադրանքի ցանկը:

Լրացնել և փոփոխել ռազմական նշանակության արտադրանքի ներմուծման և արտահանման, տարանցիկ փոխադրման և առևտրի միջնորդական գործունեության լիցենզիա ստանալու հայտի համար անհրաժեշտ պահանջները։

Հայաստանի Հանրապետության կառավարության 2009 թվականի նոյեմբերի 12-ի № 1308-Ն որոշման Հավելված 5-ով հաստատված վերջնական օգտագործողի հավաստագրի օրինակելի ձևը նախատեսված է ներքին շրջանառության համար։

Ելնելով վերոգրյալից փոփոխել Հայաստանի Հանրապետության կառավարության 2009 թվականի նոյեմբերի 12-ի № 1308-Ն որոշման Հավելված N 5-ում հաստատված վերջնական օգտագործողի հավաստագրի օրինակելի ձևը և համապատասխանեցնել Հայաստանի Հանրապետության կառավարության 2009 թվականի նոյեմբերի 12-ի № 1308-Ն որոշման Հավելված N 2, 3, 4-ի 16-րդ կետով նախատեսված պահանջներին։ 

4. Նախագծի մշակման գործընթացում ներգրավված ինստիտուտները

Նախագիծը մշակվել է Հայաստանի Հանրապետության պաշտպանության նախարարության կողմից:

5. Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին.

Նախագծի ընդունման կապակցությամբ ՀՀ պետական կամ տեղական ինքնակառավարման մարմնի բյուջեի ծախսերի և եկամուտների էական ավելացում կամ նվազեցում չի նախատեսվում:

6. Նախագծերի ընդունման առնչությամբ այլ իրավական ակտերի ընդունման անհրաժեշտության մասին.

Նախագծի ընդունումից հետո ենթաօրենսդրական նորմատիվ իրավական ակտերի նախագծերի մշակման և ընդունման անհրաժեշտությունը բացակայում է:

7. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ.

Նախագիծը չի բխում ռազմավարական հետևյալ փաստաթղթերից՝ Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ։