Ատոմ Մարգարյան
29.09.2022
Հայաստանի Հանրապետության տնտեսության զարգացման և բարձր տեխնոլոգիական ոլորտի կադրային ապահովման պահանջներից ելելով ՀՀ ԿԳՄՍ նախարարի 04․02․2020 թ․ թիվ 161-Ա/2 հրամանով, ի թիվս այլ կրթական ծրագրերի, «Հայաստանի Հանրապետության բարձրագույն մասնագիտական կրթության մագիստրոսական կրթական ծրագրերի ցանկում ավելացել է 031101.21.7 թվանիշով «Նորարարությունների տնտեսագիտություն» մագիստրոսական ծրագիրը։ «Նորարարությունների տնտեսագիտություն» մագիստրոսի որակավորում ունեցող տնտեսագետների նկատմամբ աշխատաշուկայում առկա պահանջարկը պայմանավորված է ՀՀ կառավարության որդեգրած տնտեսական բարեփոխումների ռազմավարության (Հայաստանի վերափոխման ռազմավարություն-2050), ինչպես նաև դրանից բխող տնտեսական քաղաքականության առաջնահերթություններով։ ՀՀ կառավարության գործունեության 2021-2026թթ ծրագրում, ինչպես նաև դրանից բխող՝ բազմաթիվ պաշտոնական փաստաթղթերում գիտելիքահենք, բարձրտեխնոլոգիական տնտեսության ձևավորման ու զարգացման հրամայականը շեշտված են որպես առաջնահերթ խնդիրներ։ Բնականաբար, այսօրինակ տնտեսական կերպափոխման համար անհրաժեշտ են նորարարական տնտեսության, նորարարությունների կառավարման վերաբերյալ ժամանակակից գիտելիքների, հմտությունների և կարողությունների տիրապետող բարձրակարգ, մրցունակ կադրեր, ովքեր ի վիճակի են լուծել նորարարությունների կառավարման, ինովացիոն բիզնես մոդելների գեներացման և տեխնոլոգիական նորույթների առևտրայնացման, մտավոր սեփականության գնահատման և փոխանցման բազմաբնույթ ու բազմապլան խնդիրներ։ «Նորարարությունների տնտեսագիտություն» ծրագրով արդեն երկրորդ տարին է, ինչ Հայաստանի պետական տնտեսագիտական համալսարանում կազմակերպվում է ընդունելություն։ Ու, թեև այդ մագիստրոսական ծրագրի նկատմամբ ինչպես ՀՊՏՀ, այնպես էլ բազմաթիվ այլ համալսարանների բակալավրիատի շրջանավարտների մոտ առկա մեծ հետաքրքրվածությանը, այդուհանդերձ, առայժմ չի հաջողվում ապահովել այդ մասնագիտության գծով ընդունելության պատշաճ մակարդակ (լիցենզավորված տեղերի քանակը 25 է)։ Այս իրավիճակը հիմնականում պայմանավորված է ավճար տեղերի խիստ սահմանափակ քանակով (այս տարի, օրինակ, հատկացվել է 2 անվճար տեղ), ինչպես նաև այդ կրթական ծրագրի վճարովի համակարգում սովորելու ցանկություն ունեցողների սահմանափակ ֆինանսական հնարավորություններով (առայժմ հաջողվում է ներգրավել ընդամենը 3-4 ուսանող)։ Ելնելով տվյալ իրավիճակից առաջարկում եմ «Նորարարությունների տնտեսագիտություն» (031101.21.7) մագիստրոսական կրթական ծրագրի աշխատող ուսանողներին եկամտային հարկից ուսման վարձավճարի փոխհատուցման հնարավորության տրամադրել՝ տվյալ մագիստրոսական ծրագիրը ներառելով ՀՀ կառավարության 2020 թվականի հունիսի 18-ի «Հայաստանի Հանրապետությունում հավատարմագրված բարձրագույն ուսումնական հաստատությունների մագիստրատուրայի, ասպիրանտուրայի և օրդինատուրայի այն մասնագիտությունները հաստատելու մասին, որոնցից որևէ մեկով առկա ուսուցմամբ սովորողի (ուսանողի) աշխատավարձի և դրան հավասարեցված վճարումների մասով Հայաստանի Հանրապետության հարկային օրենսգրքով սահմանված կարգով հաշվարկված եկամտային հարկն ուսման վարձավճարի փոխհատուցման նպատակով վերադարձվում է» N 1035-Ն որոշմամբ նախատեսվող փոփոխությունների ցանկում։ Հարգանքով՝ ՀՊՏՀ «Նորարարությունների տնտեսագիտություն» մագիստրոսական ծրագրի ղեկավար, տ․գ․թ․, դոցենտ Ատոմ Մարգարյան 29․09․2022