«Անշարժ գույքի հարկման նպատակով շուկայական գնահատման կարգը սահմանելու մասին»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

 ՕՐԵՆՔԸ

ԱՆՇԱՐԺ ԳՈՒՅՔԻ ՀԱՐԿՄԱՆ ՆՊԱՏԱԿՈՎ ՇՈՒԿԱՅԱԿԱՆ ԳՆԱՀԱՏՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

   Հոդված 1. Օրենքի կարգավորման առարկան

   Սույն օրենքը սահմանում է անշարժ գույքի հարկման նպատակով շուկայական գնահատման կարգը:

   Հոդված 2. Օրենքի գործողության ոլորտը

   Սույն օրենքով սահմանված կարգով հաշվարկված արժեքները հիմք են հանդիսանում անշարժ գույքի հարկով հարկման համար:

   Հոդված 3. Անշարժ գույքի հարկման նպատակով հողամասերի (բացառությամբ գյուղատնտեսական նշանակության հողատեսքերի) շուկայական գնահատման կարգը

   Անշարժ գույքի հարկման նպատակով հողամասերի (բացառությամբ գյուղատնտեսական նշանակության հողատեսքերի) շուկայական արժեքը հաշվարկվում է հետևյալ բանաձևով`

Ա_հ=Ա_բհ x Մ_հ x Գ_գ

   որտեղ`

   Ա_հ- անշարժ գույքի հարկման նպատակով հողամասի (բացառությամբ գյուղատնտեսական նշանակության հողատեսքերի) շուկայական արժեքն է,

   Ա_բհ- հողամասի (բացառությամբ գյուղատնտեսական նշանակության հողատեսքերի) մեկ քառակուսի մետր մակերեսի բազային արժեքն է,

   Մ_հ- գնահատվող հողամասի մակերեսն է՝ արտահայտված քառակուսի մետրով,

   Գ_գ- հողամասերի (բացառությամբ գյուղատնտեսական նշանակության հողատեսքերի) տարածագնահատման գոտիականության (գտնվելու վայրի) գործակիցն է:

   Անշարժ գույքի հարկման նպատակով հողամասերի շուկայական գնահատման մեթոդաբանությունը, հողամասի (բացառությամբ գյուղատնտեսական նշանակության հողատեսքերի) մեկ քառակուսի մետր մակերեսի բազային արժեքը, տարածագնահատման (գտնվելու վայրի) գոտիականության գործակիցները և սահմանները, սահմանների կոորդինատներն ու տարածագնահատման գոտիականության քարտեզները սահմանում է Հայաստանի Հանրապետության կառավարությունը:

   Հոդված 4. Անշարժ գույքի հարկման նպատակով (բացառությամբ բազմաբնակարան բնակելի շենքերի բնակարանների, բազմաբնակարան բնակելի շենքերում գտնվող ոչ բնակելի տարածքների և ավտոկայանատեղիների, բազմաբնակարան բնակելի շենքերում տեղակայված հասարակական և արտադրական նշանակության շինությունների) շուկայական գնահատման կարգը

   Անշարժ գույքի հարկման նպատակով (բացառությամբ բազմաբնակարան բնակելի շենքերի բնակարանների, բազմաբնակարան բնակելի շենքերում գտնվող ոչ բնակելի տարածքների և ավտոկայանատեղիների, բազմաբնակարան բնակելի շենքերում տեղակայված հասարակական և արտադրական նշանակության շինությունների) շուկայական արժեքը հաշվարկվում է հետևյալ բանաձևով`

Ա=Ա_հ  + Ա_շ

   որտեղ`

   Ա- անշարժ գույքի հարկման նպատակով շուկայական արժեքն է,

   Ա_հ- անշարժ գույքի հարկման նպատակով հողամասի (բացառությամբ գյուղատնտեսական նշանակության հողատեսքերի) շուկայական արժեքն է,

   Ա_շ - անշարժ գույքի հարկման նպատակով շինության շուկայական արժեքն է:

   Անշարժ գույքի հարկման նպատակով հողամասի (բացառությամբ գյուղատնտեսական նշանակության հողատեսքերի) շուկայական արժեքը (Ա_հ) հաշվարկվում է սույն օրենքի      3-րդ հոդվածով սահմանված կարգով:

   Անշարժ գույքի հարկման նպատակով շինության շուկայական արժեքը հաշվարկվում է հետևյալ բանաձևով՝

       Ա_շ = {(Ա₁ + Ա₂ + … + Ա_n) + (Ա_բշ x Գ_ծա x Մ_ծ x Գ_մծ) + (Ա_բշ x Գ_պա x Մ_պ x Գ_մպ)} x Գ_ն x Գ_գ          

   որտեղ՝

   Ա₁, Ա₂, … Ա_n - առաջին, երկրորդ և հաջորդ հարկերի (այդ թվում՝ նկուղի, կիսանկուղի, ձեղնահարկի (տանիքային հարկի)) արժեքներն են,

   Ա_բշ – շինության մեկ քառակուսի մետր մակերեսի (ներքին չափերով) բազային արժեքն է,

   Գ_ծա – ծածկերի, շվաքարանների առկայության գործակիցն է,

   Մ_ծ – ծածկերի, շվաքարանների մակերեսն է՝ արտահայտված քառակուսի մետրով,

   Գ_մծ – ծածկերի, շվաքարանների մաշվածությունը (շահագործման տևողությունը) բնութագրող գործակիցն է,

   Գ_պա – պարիսպների առկայության գործակիցն է,

   Մ_պ – պարիսպների հիմքի մակերեսն է՝ արտահայտված քառակուսի մետրով,

   Գ_մպ – պարիսպների մաշվածությունը (շահագործման տևողությունը) բնութագրող գործակիցն է,

   Գ_ն - շինության նպատակային նշանակության գործակիցն է,

   Գ_{գ -}  տարածագնահատման գոտիականության (գտնվելու վայրի) գործակիցն է:

   Ա₁, Ա₂, … Ա_n – արժեքները հաշվարկվում են հետևյալ բանաձևով՝

Ա_n = Ա_բշ x Մ_շ x Գ_նտ x Գ_ա x Գ_ծ x Գ_տ x Գ_ահ x Գ_բ x Գ_հ x Գ_օ x Գ_վ x Գ_մ

   որտեղ՝

   Ա_բշ – շինության մեկ քառակուսի մետր մակերեսի (ներքին չափերով) բազային արժեքն է,

   Մ_շ - շինության (բացառությամբ ծածկերի, շվաքարանների և պարիսպների) մակերեսն է (ներքին չափերով)՝ արտահայտված քառակուսի մետրով,

   Գ_նտ – շինության կառուցման նյութի տեսակի հետ կապված գործակիցն է,

   Գ_ա – շինության ավարտվածության աստիճանը բնութագրող գործակիցն է,

   Գ_ծ – շինության միջհարկային ծածկի տեսակի գործակիցն է,

   Գ_տ – շինության տանիքի նյութի գործակիցն է,

   Գ_ահ – շինության արտաքին հարդարման հետ կապված գործակիցն է,

   Գ_բ – շինության բարձրության (ներքին չափերով) գործակիցն է,

   Գ_հ – շինության հարկայնության գործակիցն է,

   Գ_օ – օժանդակ շինության գործակիցն է,

   Գ_վ – շինության վնասվածության աստիճանը բնութագրող գործակիցն է,

   Գ_մ – շինության մաշվածությունը (շահագործման տևողությունը) բնութագրող գործակիցն է:

   Անշարժ գույքի հարկման նպատակով (բացառությամբ  բազմաբնակարան բնակելի շենքերի բնակարանների, բազմաբնակարան բնակելի շենքերում գտնվող ոչ բնակելի տարածքների և ավտոկայանատեղիների, բազմաբնակարան բնակելի շենքերում տեղակայված հասարակական և արտադրական նշանակության շինությունների) շուկայական գնահատման մեթոդաբանությունը, շինության մեկ քառակուսի մետր մակերեսի (ներքին չափերով) բազային արժեքը, տարածագնահատման (գտնվելու վայրի) գոտիականության գործակիցները և սահմանները, սահմանների կոորդինատներն ու տարածագնահատման գոտիականության քարտեզները, շինությունների քանակական և որակական բնութագրիչների գործակիցների մեծությունները սահմանում է Հայաստանի Հանրապետության կառավարությունը:

   Հոդված 5. Անշարժ գույքի հարկման նպատակով բազմաբնակարան բնակելի շենքերի բնակարանների, բազմաբնակարան բնակելի շենքերում գտնվող ոչ բնակելի տարածքների և ավտոկայանատեղիների, բազմաբնակարան բնակելի շենքերում տեղակայված հասարակական և արտադրական նշանակության շինությունների շուկայական գնահատման կարգը

   Անշարժ գույքի հարկման նպատակով բազմաբնակարան բնակելի շենքերի բնակարանների, բազմաբնակարան բնակելի շենքերում գտնվող ոչ բնակելի տարածքների և ավտոկայանատեղիների, բազմաբնակարան բնակելի շենքերում տեղակայված հասարակական և արտադրական նշանակության շինությունների շուկայական արժեքը հաշվարկվում է հետևյալ բանաձևով`

Ա= Ա_բշ x Մ_շ x Գ_նտ x Գ_ա x Գ_ծ x Գ_բ x Գ_հ x  Գ_վ x Գ_մ x Գ_ն x Գ_գ

   որտեղ`

   Ա_բշ - շինության մեկ քառակուսի մետր մակերեսի (ներքին չափերով) բազային արժեքն է,

   Մ_շ- շինության մակերեսն է (ներքին չափերով)՝ արտահայտված քառակուսի մետրով,

   Գ_նտ - շինության կառուցման նյութի տեսակի հետ կապված գործակիցն է,

   Գ_ա- շինության ավարտվածության աստիճանը բնութագրող գործակիցն է,

   Գ_ծ - շինության միջհարկային  ծածկի  տեսակի  գործակիցն է,

   Գ_բ - շինության բարձրության (ներքին չափով) գործակիցն է,

   Գ_հ - շինության հարկայնության գործակիցն է,

   Գ_վ - շինության վնասվածության աստիճանը բնութագրող գործակիցն է,

   Գ_մ- շինության մաշվածությունը (շահագործման տևողությունը) բնութագրող գործակիցն է,

   Գ_ն - շինության նպատակային նշանակության գործակիցն է,

   Գ_գ - տարածագնահատման գոտիականության (գտնվելու վայրի) գործակիցն է:

   Անշարժ գույքի հարկման նպատակով բազմաբնակարան բնակելի շենքերի բնակարանների, բազմաբնակարան բնակելի շենքերում գտնվող ոչ բնակելի տարածքների և ավտոկայանատեղիների, բազմաբնակարան բնակելի շենքերում տեղակայված հասարակական և արտադրական նշանակության շինությունների շուկայական գնահատման մեթոդաբանությունը, շինության մեկ քառակուսի մետր մակերեսի (ներքին չափերով) բազային արժեքը, տարածագնահատման (գտնվելու վայրի) գոտիականության գործակիցները և սահմանները, սահմանների կոորդինատներն ու տարածագնահատման գոտիականության քարտեզները, շինությունների քանակական և որակական բնութագրիչների գործակիցների մեծությունները սահմանում է Հայաստանի Հանրապետության կառավարությունը:

   Հոդված 6. Անցումային դրույթներ

   Սույն օրենքն ուժի մեջ մտնելու օրվանից ուժը կորցրած է ճանաչվում Հայաստանի Հանրապետության 2016 թվականի հոկտեմբերի 4-ի ՀՕ-165-Ն հարկային օրենսգրքի 11-րդ բաժնի 1-ին հավելվածը:

   Հոդված 7.  Օրենքի ուժի մեջ մտնելը

   Սույն օրենքն ուժի մեջ է մտնում 2020 թվականի հունվարի 1-ից: