ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2015 ԹՎԱԿԱՆԻ ՀՈԿՏԵՄԲԵՐԻ 15-Ի N 1204-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ»

ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1. Ընթացիկ իրավիճակը և իրավական ակտի ընդունման անհրաժեշտությունը

Հայաստանի Հանրապետության կառավարության 2015 թվականի հոկտեմբերի 15-ի N 1204-Ն որոշմամբ սահմանվել է տեղեկատվություն տնօրինողի կողմից մշակված կամ նրան առաքված տեղեկությունների գրանցման, դասակարգման և պահպանման, ինչպես նաև պետական և տեղական ինքնակառավարման մարմինների, պետական հիմնարկների ու կազմակերպությունների կողմից տեղեկության կամ դրա կրկնօրինակի (պատճենի) տրամադրման կարգը։

Միաժամանակ, ««Տեղեկատվության ազատության մասին» օրենքում փոփոխություններ կատարելու մասին» 2025 թվականի դեկտեմբերի 4-ի ՀՕ-445-Ն օրենքով «Տեղեկատվության ազատության մասին» 2003 թվականի սեպտեմբերի 23-ի ՀՕ-11-Ն օրենքի 5-րդ հոդվածն ուժը կորցրած է ճանաչվել, ինչպես նաև ուժը կորցրած է ճանաչվել 10-րդ հոդվածի 1-ին մասը։ Նույն օրենքն ուժի մեջ է մտել 2026 թվականի հունվարի 4-ին։

Այսպիսով, վերացվել են այն օրենսդրական նորմերը, որոնց հիման վրա ընդունվել էր ՀՀ կառավարության 2015 թվականի հոկտեմբերի 15-ի N 1204-Ն որոշումը, հետևաբար ուժը կորցրած պետք է ճանաչվի նաև ենթաօրենսդրական ակտը և ապահովվի գործող իրավակարգավորումների համապատասխանությունը օրենքների ներկա խմբագրությանը։

2. Կարգավորման նպատակը և բնույթը

Նախագծի նպատակը գործող իրավական դաշտի համակարգվածությունն ու ներդաշնակեցումն ապահովելն է՝ ուժը կորցրած ճանաչելով Կառավարության այն որոշումը, որի հիմքում ընկած լիազորող նորմերը այլևս չեն գործում։

Կարգավորումը տեխնիկաիրավական բնույթ ունի և ուղղված է իրավական ակտերի միջև հակասությունների, կրկնությունների և օրենսդրական հիմք չունեցող ենթաօրենսդրական կարգավորման պահպանման ռիսկի վերացմանը։

3. Նախագծի մշակման գործընթացում ներգրավված ինստիտուտները և անձինք

·                            Բարձր տեխնոլոգիաների արդյունաբերության նախարարություն,

·                         «Հայաստանի տեղեկատվական համակարգերի գործակալություն» հիմնադրամ։

4. Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները

Նախագծի ընդունման դեպքում Հայաստանի Հանրապետության պետական բյուջեի եկամուտների և ծախսերի մասով լրացուցիչ ֆինանսական միջոցների անհրաժեշտություն չի առաջանա:

5. Կապը ռազմավարական և ծրագրային փաստաթղթերի հետ

Նախագիծը բխում է «Տեղեկատվության ազատության մասին» օրենքից։

Նախագծի ընդունումը պայմանավորված է նաև ՀՀ վարչապետի 2026 թվականի փետրվարի 13-ի ««Կիբեռանվտանգության մասին», «Հանրային տեղեկությունների մասին», «Տեղեկատվական համակարգերի կարգավորման մարմնի մասին», «Անձնական տվյալների պաշտպանության մասին» օրենքում փոփոխություններ և լրացումներ կատարելու մասին», «Պետական գաղտնիքի մասին» օրենքում փոփոխություն կատարելու մասին», «Տեղեկատվության ազատության մասին» օրենքում փոփոխություններ կատարելու մասին», «Կառավարության կառուցվածքի և գործունեության մասին» օրենքում լրացում կատարելու մասին», «Ազգային անվտանգության մարմինների մասին» օրենքում փոփոխություններ և լրացումներ կատարելու մասին» օրենքների կիրարկումն ապահովող միջոցառումների ցանկը հաստատելու մասին» N 117-Ա որոշմամբ սահմանված միջոցառումների ցանկի 32-րդ միջոցառման կատարմամբ։