Ռազմավարական փաստաթղթերի մշակման անհրաժեշտությունը պայմանավորված է վերջին տարիներին Հայաստանի Հանրապետության սոցիալ-իրավական կյանքում տեղի ունեցած շրջադարձային փոփոխություններով, այդ թվում՝ 2015թ. սահմանադրական փոփոխություններով, միջազգային պարտավորություններից բխող հրատապ միջոցների ձեռնարկման կարևորությամբ և, ի վերջո, 2018թ. երկրում տեղի ունեցած թավշյա, ոչ բռնի, ժողովրդական հեղափոխության արդյունքում առաջ եկած առաջնահերթություններով:
2015 թվականին տեղի ունեցած սահմանադրական փոփոխությունների արդյունքում էականորեն վերանայվեցին մարդու իրավունքների վերաբերյալ սահմանադրական կարգավորումները։ Առաջին հերթին, Սահմանադրության մեջ տարանջատվեցին մարդու և քաղաքացու հիմնական իրավունքների և ազատությունների վերաբերյալ դրույթները տնտեսական, սոցիալական, մշակութային ոլորտներում օրենսդրական երաշխիքների և պետության քաղաքականության հիմնական նպատակների կարգավորումներից (համապատասխանաբար Սահմանադրության 2-րդ և 3-րդ գլուխներ)։
Հաշվի առնելով մարդու իրավունքների պաշտպանության ոլորտում ՀՀ կողմից ստանձնած միջազգային պարտավորությունների կատարման հրամայականը՝ մեծ կարևորություն է ստանում ՀՀ միջազգային պայմանագրերի հիման վրա գործող մոնիթորինգային մարմինների (ՄԱԿ-ի մարդու իրավունքների խորհուրդ, Եվրոպայի խորհուրդ, Մարդու իրավունքների եվրոպական դատարան, Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական հանձնաժողով (CPT) և այլն) հանձնարարականների արդյունավետ կատարումը և զեկույցներում բարձրացված խնդիրների հասցեագրումը։ Այս համատեքստում մեծ նշանակություն և կարևորություն ունի գործընկեր միջազգային կազմակերպությունների (այդ թվում՝ ՄԱԿ, ԵՄ, ԵԽ, ԵԱՀԿ և այլն) զեկույցներում բարձրացված խնդիրների լուծմանն ուղղված գործողությունների հստակ պլանավորումը և իրականացումը։
Ի հավելումն վերոգրյալի՝ 2018 թվականին Հայաստանի Հանրապետությունում տեղի ունեցած թավշյա, ոչ բռնի, ժողովրդական հեղափոխության արդյունքում երկրի առջև ի հայտ եկան նոր մարտահրավերներ, որոնք պետք է հաղթահարվեն մի կողմից՝ մարդու իրավունքների խախտումների համար պատասխանատվության անխուսափելիության, մյուս կողմից նաև՝ մարդու իրավունքների ու հիմնարար ազատությունների ապահովման հրամայականների պահպանմամբ: 2018թ. Հայաստանի Հանրապետությունում տեղի ունեցած ընտրությունների արդյունքում օրենսդիր և գործադիր մարմինների կազմերի փոփոխությունները և նոր իշխանության կողմից նախանշված առաջնահերթությունները պարտադրում են նաև մարդու իրավունքների ոլորտում նոր Ռազմավարական փաստաթղթերի մշակումը և ընդունումը: