ՆԱԽԱԳԻԾ
«ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՍՏՈՒԳՈՒՄՆԵՐԻ ԿԱԶՄԱԿԵՐՊՄԱՆ ԵՎ ԱՆՑԿԱՑՄԱՆ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ
Հոդված 1. «Հայաստանի Հանրապետությունում ստուգումների կազմակերպման և անցկացման մասին» Հայաստանի Հանրապետության 2000 թվականի մայիսի 17-ի ՀՕ-60 օրենքի (այսուհետ` Օրենք) 1-ին հոդվածում`
- 1-ին մասի «անհատ ձեռնարկատերերի» բառերից հետո լրացնել «մեկ մարդատար-տաքսի ավտոմոբիլով փոխադրումներ իրականացնող ֆիզիկական անձինք, ոչ կանոնավոր փոխադրոմներ իրականացնողներ» բառերով.
- 3-րդ մասի «երկրորդ պարբերությամբ» բառերը փոխարինել «երկրորդ և երրորդ պարբերություններով» բառերով.
- 3-րդ մասը լրացնել նոր պարբերությամբ.
««Ավտոմոբիլային տրանսպորտի մասին» Հայաստանի Հանրապետության օրենքով սահմանված դեպքերում Հայաստանի Հանրապետության քաղաքաշինության, տեխնիկական և հրդեհային անվտանգության տեսչական մարմինն կատարում է հսկիչ գնում` սույն օրենքի N 2.2 հավելվածով սահմանված կարգով, որոնց արդյունքներն օգտագործվում են տնտեսվարող սուբյեկտի կողմից «Ավտոմոբիլային տրանսպորտի մասին» Հայաստանի Հանրապետության օրենքը խախտելու հարցը քննարկելու նպատակով: Տնտեսվարող սուբյեկտների և ստուգող անձանց` սույն օրենքով սահմանված իրավունքներն ու պարտականությունները գործում են նաև սույն պարբերությամբ սահմանվող ուսումնասիրությունների դեպքում:»:
Հոդված 2. Օրենքը լրացնել նոր 2.2-ի հավելվածով.
| |
«Հավելված 2.2
«Հայաստանի Հանրապետությունում
ստուգումների կազմակերպման
և անցկացման մասին» Հայաստանի
Հանրապետության օրենքի
|
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՇԻՆՈՒԹՅԱՆ, ՏԵԽՆԻԿԱԿԱՆ ԵՎ ՀՐԴԵՀԱՅԻՆ ԱՆՎՏԱՆԳՈՒԹՅԱՆ ՏԵՍՉԱԿԱՆ ՄԱՐՄՆԻ ՀՍԿԻՉ ԳՆՄԱՆ ԿԱՐԳԸ
1.1. Սույն կարգով սահմանվում են «Ավտոմոբիլային տրանսպորտի մասին» Հայաստանի Հանրապետության օրենքով նախատեսված դեպքերում Հայաստանի Հանրապետության քաղաքաշինության, տեխնիկական և հրդեհային անվտանգության տեսչական մարմնի (այսուհետ՝ տեսչական մարմին) կողմից տնտեսվարող սուբյեկտի փաստացի գործունեությունը բացահայտելու համար:
1.2. Տեսչական մարմնի հսկիչ գնում է համարվում ավտոմոբիլային տրանսպորտի բնագավառի իրավական ակտերի, լիցենզիաների և միջազգային թույլտվությունների պահանջներ կատարելուն վերաբերող՝ տեսչական մարմնի իրականացրած ուսումնասիրությունը:
Հսկիչ գնումը կատարվում է տեսանկարահանելու կամ ձայնագրելու միջոցով :
1.3. Հսկիչ գնման համար հիմք են՝
1) տեսչական մարմնի համապատասխան աշխատակցի՝ տեսչական մարմնի ղեկավարին ուղղված զեկուցագիրը հսկիչ գնում կատարելու մասին.
2) երրորդ անձից ստացված տեղեկությունը (այսուհետ՝ դիմում): Երրորդ անձ է համարվում հսկիչ գնման կողմ չհամարվող անձ, որը ավտոմոբիլային տրանսպորտի բնագավառի օրենսդրության պահանջների հնարավոր խախտումների վերաբերյալ տեսչական մարմին է ներկայացնում դիմում:
1.4. Հսկիչ գնում կատարվում է տեսչական մարմնի ղեկավարի հանձնարարագրով (այսուհետ՝ հանձնարարագիր), որում նշվում են հսկիչ գնում կատարելու հիմքերը, նպատակը, տնտեսվարող սուբյեկտի տվյալները (ֆիզիկական անձի դեպքում՝ անձնագրային տվյալները կամ հանրային ծառայության համարանիշը, անհատ ձեռնարկատիրոջ դեպքում՝ ՀՎՀՀ-ն, անունը, ազգանունը, իսկ իրավաբանական անձի դեպքում՝ ՀՎՀՀ-ն, լրիվ անվանումը և գտնվելու վայրը), հսկիչ գնում կատարելու վայրը, ժամկետները և տեսչական մարմնի՝ հսկիչ գնում կատարող պաշտոնատար անձի (անձանց) տվյալները (անունը, ազգանունը, պաշտոնը)՝ վավերացված տեսչական մարմնի կնիքով:
1.5. Հսկիչ գնումը կատարվում է առանց տնտեսավարող սուբյեկտների նախնական ծանուցման։
Հսկիչ գնումից հետո հանձնարարագիրը ներկայացվում է տնտեսվարող սուբյեկտին (իրավաբանական անձի դեպքում՝ ղեկավարին կամ փոխարինող պաշտոնատար անձին):
1.6. Հսկիչ գնումի արդյունքում կազմվում է տեսչական մարմնի սահմանված ձևով արձանագրություն՝ երկու օրինակից: Արձանագրության մեջ նշվում են հանձնարարագրի համարը, ամսաթիվը, արձանագրությունը կազմելու վայրը, հսկիչ գնում կատարելու վայրը, ժամանակը, հսկիչ գնում կատարող պաշտոնատար անձի (անձանց) (անունը, ազգանունը, պաշտոնը): Արձանագրությունն ստորագրում է հսկիչ գնում կատարող անձը (անձինք) և տնտեսվարող սուբյեկտը (իրավաբանական անձի դեպքում՝ ղեկավարը կամ փոխարինող պաշտոնատար անձը) կամ նրա անունից ծառայություն մատուցողը: Արձանագրությունն հանձնվում է տնտեսվարող սուբյեկտին (իրավաբանական անձի դեպքում՝ ղեկավարին կամ փոխարինող պաշտոնատար անձին), որն առարկություններ ունենալու դեպքում դրանք ներկայացնում է գրավոր:
- Տեսչական մարմնի հսկիչ գնումները ֆինանսավորվում են պետական բյուջեից տեսչական մարմնի համար նախատեսված միջոցների հաշվին:»:
Հոդված 3. Սույն օրենքն ուժի մեջ է մտնում պաշտոնական հրապարակման օրվան հաջորդող տասներորդ օրը: